VANÉ KE, EWRO ROJA ŞIMA WA DAYÉ
[ DERSİM 38 ]
Geschrieben von İlhami Sertkaya (aktari) am 11. Mai 2008 20:06:23:
VANÉ KE, EWRO ROJA ŞIMA WA DAYÉ
Qey heni vanê, mı hina rınd fam nêkerdo dayê...
Ewro roja şıma wa heni niyo dayê? Tı ki zanena dayê?. Ez inam nêkena ke tı bızanê. Çı ke şıma 'roj nêdi'. Ruyê şıma zê çiçega xeman, zerê şıma neqebê derdan..
Berbayi, qaytê rayanê duri kerdi, dıma domananê xo de kewti rayan, qereqolan, zindanan, şukan....
Derdê cigere, cigera şıma ra dardekerde bi...
Kesi vengê şıma nêheşêna, sare siya biyi şıma...
Qar u qotıkê na dınya, lêlê sodıri de, şewan de hewnê şıma kerdêne lete bı lete. Kewerê şıma şıkiyayi, balişna şıma dırnayi,rısqê şıma dêm diya...
Wastena şıma, ne 'zerbazın'bi, ne fistanê xas u rengıni...
Wastena şıma ne mal u mılk bi, ne bax u baxçeyi...
Wastena şıma 'cigera' şıma, domanê şıma bi...
Domanê şıma, şıma ra vısnayi, roje amê şıma meyitê domanê xo di, roja amê şıma ne meyitê domanê xo di, ne 'veng ne vac'....
Xezebê vindibiyene de, emrê şıma poyiya, destê şıma lerca,vengê şıma de pepuge şerm kerde...
'Cigera mı tı kotiyaaa'....
'Lacê mıno delal, kêneka mına kıbare, tı koti de ra endi bêêê'.....
Porê şıma bi 'gezık', vayê xezebi, ruyê şıma ruçıkna...
Ax mayêne mayêne....
Ewro roja şıma wa heni niyo dayê..?
Heni vanê dayê...
Ez ke ju gulê bıdi to, tı şıkina xoritiya zerê xo de, ê xezebê bêbıni vecê?...
Xemê to ebe a gule qedino..?
Ax ke derdê to ebe ju gule bıqediyêne...
Maya mına delale, helinê domantiya mı...
Germiya vırara to, zaf kewta mı viri dayê...
Ez nêwazena xoritiya zerê to bılewni dayê, ez nêwazena tı ni nusnê mı bıwanê...
Mewane dayê...
Nıka resmê to serê masa mıde ro, zerê mı biyo ser u bın, tı meheşêne dayê...
Lêwê resmê to de, mı ju gule na ro, mabênê resmê to u gule de, tı zen kena derdê sed seran vınetê...
Qaytkerdena mı, mabênê na gule u ruyê to de, zê 'bıza xêxe' gêrena...
Resmê to u gule heni bêvengê ke...
Na bêvengiye de,vengê de heni hit, heni bari u xori vecino ke....
Ez gege resmê to u gule vurnena, cayê şıma vurnena, nêzanena ke qey...
Çı bızani,ez ewro wazena bı bi doman, a domantiya ke vırara to ra mırd nêbi, vêşan o....
Dıme ra dayê; mı qasete vete, goşdariya a kılame kerde;
'LACÉ MI ÇI PERS KENA.? A KE MA DİYA KESİ NÉDİYA..'...
Heya dayê, ne ez pers bıkeri, ne tı vace....
Ewro roja şıma wa heni vanê...
Mı zaf wastê ke ez xemê şıma bıkeri barê xo.
Wastena mı, derd u kesırê şıma bıqediyo,derdê 'cigere' mevênê
Seba şıma, mıradê mı no wo....
Lew nena destê şıma ra...İlhami Sertkaya
11-5-2008
Çıme
www.ilhamisertkaya.comwww.karer.org
[ DERSİM 38 ]